Արդշինբանկն աջակցում է հայկական ջազի զարգացմանը | ardshinbank

Արդշինբանկն աջակցում է հայկական ջազի զարգացմանը

Արդշինբանկը և Հայաստանի պետական ջազ նվագախումբը կնքել են համագործակցության պայմանագիր, որով բանկը ֆինանսական աջակցություն կտրամադրի նվագախմբին։ 

Արդշինբանկի վարչության նախագահ Արտակ Անանյանի խոսքով՝ Արդշինբանկի համար արվեստի աջակցությունը և մշակութային ժառանգության պահպանությունը Բանկի գործունեության կարևորագույն ուղղություններից են։

«Մշակույթի միջոցով հասարակության հետ համագործակցությունը հաղորդակցության ամենաարդյունավետ միջոցներից է, քանի որ մշակույթի միջոցով են փոխանցվում նաև մարդկային հիմնական արժեքները։ Հայաստանի պետական ​​ջազ նվագախմբի հետ համագործակցությունը մեծ պատասխանատվություն է Բանկի համար։ Մեր համագործակցության հիմնական նպատակն է աջակցել բարձր ջազի իրական վարպետներին։ Վստահ եմ, որ այս համագործակցության արդյունքում կստեղծվեն նոր արժեքներ, որոնք կնպաստեն մեր մշակութային տարածքի զարգացմանը»,- իր խոսքում նշել է Արտակ Անանյանը։

Հայաստանի պետական ​​ջազ նվագախմբի գեղարվեստական ​​ղեկավար Արմեն Հյուսնունցը պարզաբանում է.

«Հայաստանի պետական ջազ նվագախումբն իր ավելի քան 80-ամյա գործունեության ընթացքում թե՛ Խորհրդային Հայաստանի, թե՛ Հայաստանի Հանրապետության մշակութային պատմության մեջ բազմաթիվ արժեքավոր էջեր է ավելացրել։ Նվագախումբն այսօր շարունակում է իր ակտիվ ստեղծագործական կյանքը՝ սպասված լինելով աշխարհի լավագույն բեմերում, իսկ Հայաստանում՝ համագործակցելով համաշխարհային համբավ ունեցող տաղանդավոր արտիստների հետ։ Սակայն նվագախմբի նպատակը միայն անցյալում ստեղծված արժեքները պահպանելը կամ արևմտյան մշակույթի սիրահարներին ջազ երաժշտություն մատակարարելը չէ։ Նվագախումբը կրթում է սերունդներ, փոխանցում արժեքներ, սահմանում է մշակութային որակների նշաձողեր, և այս ամենը՝ ջազին այնքան հատուկ ազատ շնչով։

Ազատությունը, սակայն, արտահայտվում է միայն ստեղծագործական մղման մեջ, իսկ իրագործման մեջ այն հեշտությամբ սահմանափակվում է, երբ չկան բավարար ֆինանսական միջոցներ։ Մեր գործընկերոջ՝ Արդշինբանկի օգնությունն անգնահատելի է նվագախմբի ֆինանսական ծախսերի կառավարման գործում։ Արդյունքում մենք կկարողանանք Հայաստանում պահել լավագույն մասնագետներին և երաժիշտներին, որոնք արդեն իսկ բազմաթիվ հրավերներ ունեն արտերկրից, սակայն չեն արտագաղթում՝  հավատալով մեր երկրի ներուժին»։

 

Content for comparison

ԷՋԸ ԹԱՐՄԱՑՎԵԼ Է Չոր, 2022-08-31 14:23
Developed by Studio One